Gemeinde:  OCHSENFURT

Goßmannsdorf | von goasdorfer

Jetzt wollt ich doch neulich bei dem Dreggswedder zu meiner Omma aufn Friedhopf läff. Weil vornne auf der Hauptstraß der Verkehr mit denner Rüberlaster widder mal so kaotisch war, bin ich hinner an der Dorfmauer, im Lähmgruberwäch vorbei endlanggeloffer. Ee Dreckloch nach än annern. Jetzt ham die zwar neulich a halbi Fuhr Kies da hinner na gschmisser, abber wirklich had sich da a nix gebessert. Vorsorchlich ham se dann a no gleich zwä Schilder aufkhengt, auf denner stett, dass der Wäch ned geräumd und ned gstreud wird.

Die Blädder vom Härbsd fliecher a no rum, die hold a kenner ab, obwohl die scho stellerweis zammgerechert worrn sinn und nur aufglade wäre müsse. Und wenn se scho zum Schilderauhäner beordert wärn, dann könne se doch a wenigstens glei die ganze Blädder mitnämm, abber des kommt ja kenn nein Sinn. Wemm mä bedengd, zwä mal Schilder aufheng zwä Stund Ärberd und vier Lidder Sprit in der Gechend verfahrn. Ke wunner dass die Stadt ke Geld mär had.

Wenns denn dann blos mal widder ned demm Börchermäster sein Sohn auf demm Wäch zu seiner Ärberd da hinner rum bei Eis unn Schnee naschmeddert. Nicht auszudenken wenn da mal a Omma aufn Wäch zum Friedhof danaus nafällt. Praktisch wärs vielleicht scho, die könne se dann gleich in derer neue Leicherhalle eibehald. Aber vielleicht bringerses ja fertich und stelle wie annerswo im Kaff, ä Kiste Steusalz an denn Wäch, dann könner vielleich ab und zu die Anwohner mal ä weng Salz streu und der Wäch wär im Winder ned ganz so gfährlich.

In diesem Sinne, Grüß Gott vom Gasserschoasch.